Menyu



O‘zbekiston Respublikasi Vazirlar Mahkamasi huzuridagi
«Sanoatgeokontexnazorat»
Davlat inspeksiyasi

Umumiy ma’lumotlar

O‘zbekiston Respublikasi Vazirlar Mahkamasi huzuridagi
Yer qa’rini geologik o‘rganish, sanoatda, konchilikda va kommunal-maishiy sektorda
ishlarning bexatar olib borilishini nazorat qilish davlat inspeksiyasi.

«SANOATGEOKONTEXNAZORAT» Davlat inspeksiyasi faoliyatidan xabardormisiz

Faoliyat

Quyidagilar «Sanoatgeokontexnazorat» davlat inspeksiyasining asosiy vazifalari hisoblanadi:

  • Yuridik va jismoniy shaxslarning sanoat va radiatsiya xavfsizligi, gaz ta’minoti, yer qa’rini geologik o‘rganishda yer osti boyliklaridan foydalanish va ularni muhofaza qilish, foydali qazilmalarni qazib olish, mineral xom ashyoni qayta ishlash, shuningdek kon ishlarini geologiya-marksheyderlik xizmati bilan ta’minlash sohasidagi qonun hujjatlari va normativ-texnik hujjatlar talablariga rioya qilishlari yuzasidan davlat nazoratini amalga oshirish,
  • Sanoat va radiatsiya xavfsizligi, shuningdek kon nazorati sohasida oldini olish chora-tadbirlarini ishlab chiqish va amalga oshirish,
  • Gaz xo‘jaligi tizimida hamda ko‘p kvartirali turar joylar va respublika kommunal-maishiy ob’ektlarining gaz ta’minotida xavfsizlik ta’minlanishini nazorat qilish,
  • «Sanoatgeokontexnazorat» davlat inspeksiyasi vakolatiga kiruvchi masalalar bo‘yicha normativ-huquqiy va normativ-texnik hujjatlarni ishlab chiqish va belgilangan tartibda qabul qilish,
  • Sanoat xavfsizligi ekspertizasi, sanoat xavfsizligi sohasida faoliyat ko‘rsatuvchi mutaxassislarni tayyorlash va qayta tayyorlash tizimlarini joriy etish hamda ularning faoliyati va rivojlantirilishini ta’minlash.

«Sanoatgeokontexnazorat» davlat inspeksiyasi o‘z faoliyatini vazirliklar, davlat qo‘mitalari, idoralar, xo‘jalik boshqaruvi organlari, mahalliy davlat hokimiyati organlari, boshqa tashkilotlar bilan o‘zaro hamkorlikda amalga oshiradi, xalqaro bitimlar asosida boshqa davlatlarning davlat nazorat organlari bilan o‘zaro ish olib boradi va hamkorlik qiladi.

«Sanoatgeokontexnazorat» davlat inspeksiyasining sanoat va radiatsiya xavfsizligi, kon munosabatlari, yer qa’ridan foydalanish va ularni muhofaza qilish masalalari bo‘yicha o‘z vakolati doirasida qabul qilgan qarorlari vazirliklar, davlat qo‘mitalari, idoralar, xo‘jalik boshqaruvi organlari, mahalliy davlat hokimiyati organlari, boshqa tashkilotlar tomonidan bajarilishi majburiydir.

Tarixiy ma’lumot

1947 yil 16 dekabr kuni 4048-sonli Sovet Sotsialistik Respublikalar Ittifoqi Ministrlar Sovetining qaroriga binoan SSSR Ministrlar Soveti qoshidagi Davlat konchilik nazorati Bosh Boshqarmasining O‘rta Osiyo konchilik okrugi Boshqarmasi tashkil etildi.

SSSR Ministrlar Sovetining 1958 yil 24 aprelda 448-sonli va O‘zbekiston SSSR Ministrlar Sovetining 1958 yil 2 iyundagi 357-sonli qarorlariga asosan va O‘rta Osiyo konchilik okrugi Boshqarmasi Sanoatda va konchilik nazorati sohasida ishlarni bexatar olib borilishini nazorat qilish O‘zbekiston SSR Ministrlar Soveti qoshidagi Davlat Qo‘mitasiga o‘zgartirildi.

O‘zSSR Ministrlar Soveti qoshidagi O‘zSSR Sanoatda va konchilikda ishlarni bexatar olib borilishini nazorat qilish Davlat Qo‘mitasi O‘zSSR Ministrlar Sovetining 1982 yil 14 iyuldagi 494-sonli qaroriga asosan O‘zbekSSR Sanoatda va konchilikda ishlarni bexatar olib borilishini nazorat qilish Davlat Qo‘mitasiga (Gosgortexnadzor UzSSR) mukammallashtirildi.

O‘zSSR Sanoatda va konchilikda ishlarni bexatar olib borilishini nazorat qilish Davlat Qo‘mitasi O‘zbekiston Respublikasi Vazirlar Mahkamasining 1996 yil 10 yanvardagi 17-sonli qarori asosida O‘zbekiston Respublikasi Sanoatda va konchilikda ishlarni bexatar olib borilishini nazorat qilish Davlat Qo‘mitasiga qayta nomlandi.

O‘zbekiston Respublikasi Prezidentining 2000 yil 07 fevraldagi UP-2535-sonli farmoniga asosan O‘zbekiston Respublikasi Sanoatda va konchilikda ishlarni bexatar olib borilishini nazorat qilish Davlat Qo‘mitasi «Sanoatkontexnazorat» Agentligiga aylantirildi.

O‘zbekiston Respublikasi Prezidentining 2004 yil 09 iyuldagi 3454-sonli Farmoniga asosan «Sanoatkontexnazorat» Agentligi «Sanoatkontexnazorat» Davlat inspeksiyasiga aylantirildi.

O‘zbekiston Respublikasi Sanoatda, konchilikda va kommunal-maishiy sektorda ishlarning bexatar olib borilishini nazorat qilish davlat inspeksiyasi ("Sanoatkontexnazorat" davlat inspeksiyasi) barcha yuridik va jismoniy shaxslar tomonidan respublika hududida sanoat va radiatsiya xavfsizligiga, yer osti boyliklaridan foydalanish va ularni muhofaza qilishga doir qonun hujjatlari va normativ-texnik hujjatlarga, shuningdek davlat tomonidan tartibga solishning boshqa chora-tadbirlariga rioya etilishi ustidan davlat nazoratini belgilangan tartibda amalga oshiruvchi sanoat xavfsizligi sohasidagi maxsus vakolatli davlat boshqaruvi organi hisoblanadi.

Respublikamiz 1994 yildan buyon Xalqaro Atom Energiyasi Agentligiga (XAEA) a’zo. Inspeksiyaga radioaktiv materiallarni qazib olish, ishlatish va tashish, yadroviy-xavfli ob’ektlarni faoliyati ustidan nazorat o‘rnatish yuklatilgan.

1996 yildan buyon Xalqaro bakteriologik (biologik) qurollarni taqiqlash Konvensiyasi va 1997 yildan buyon Xalqaro kimyoviy qurolni taqiqlash Konvensiyasi a’zosi bo‘lgan Respublikamizning 1997 yil 6 iyundagi 287-sonli va 1998 yil 22 sentabrdagi 405-sonli qarorlariga asosan ushbu Konvensiyalarning O‘zbekiston Respublikasida bajarilishini nazorat qilish ham Davlat inspeksiyasi zimmasida.

Hozirgi kunda «Sanoatkontexnazorat» Davlat inspeksiyasi zimmasiga qo‘shimcha vakolatlar yuklatilgan. Jumladan, inspeksiya gaz xo‘jaligi tizimida hamda ko‘p qavatli uylar va kommunal-maishiy ob’ektlarning gaz ta’minotidagi xavfsizligini ta’minlash yuzasidan keng ko‘lamli chora-tadbirlar amalga oshirilmoqda. Turar-joylarning gaz tarmoqlari va gaz xo‘jaligi yuqori texnik jihatdan tayyor holatda bo‘lishi, eng avvalo, ko‘p qavatli uylarda xavfsizlikni ta’minlash juda muhimdir.

Davlat inspeksiyasi sanoat korxonalarida avariya va baxtsiz xodisalarning oldini olish, xodimlarni muhofaza qilish sohasidagi davlat siyosatining eng asosiy tamoyilaridan biri bo‘lgan ishlab chiqarish faoliyati natijasidan qat’iy nazar xodim hayoti va sog‘ligi ustivorligini ta’minlashga e’tibor qaratadi.

Sanoat xavfsizligiga e’tibor berish, zamonaviy texnika va texnologiyalarni ishlab chiqarishga tatbiq etish jarayonida mehnat va ishlab chiqarish intizomiga qat’iy rioya qilish baxtsiz xodisalarning kamayishiga, avariyalarning oldini olishga imkon beradi.

Mustaqillik yillarida xodimlarga mehnat sharoitlarini yaxshilash, ularning ish jarayonida xavfsizligini ta’minlashga hamda sog‘lig‘iga zarar yetkazmaslik yo‘lida bir qator qonunlar va qonunosti hujjatlari qabul qilindi. 2006 yili «Xavfli ishlab chiqarish ob’ektlarining sanoat xavfsizligi to‘g‘risida»gi O‘zbekiston Respublikasi Qonuni ushbu talablarning to‘liq amalga oshirilishini kafolatlovchi huquqiy hujjat bo‘ldi.

Inspeksiyaning faoliyati haqida to‘xtalib, bugungi kunda amalga oshirayotgan o‘ta dolzarb masala — tabiat musaffoligi va inson xavfsizligini ta’minlashdek mas’uliyatli vazifani sidqidildan ado etayotganligi ta’kidlash lozim.

Agar siz matnda xatoliklarni aniqlasangiz,
ularni belgilab,
ma’muriyatni xabardor qilish uchun
Ctrl + Enter tugmalarini bosing.